Hafnarfjörður er þriðji stærsti bær landsins með rúmlega 26.000 íbúa. Hafnarfjörður liggur vel við samgöngum, aðeins 30 km frá Bláa Lóninu og 50 km frá Leifstöð í Keflavík. Einungis 10 km eru til Reykjavíkur og þangað ganga almenningsvagnar reglulega. Hafnarfjörður er kjörinn áningastaður ferðamanna og fjölmargir ferðamenn erlendir sem íslenskir heimsækja Fjörðinn ár hvert.
Menningarbærinn
Í menningarlífi Hafnarfjarðar kennir margra grasa. Í Hafnarborg eru reglulegar listsýningar og á Byggðasafni Hafnarfjarðar er sögunni gerð góð skil. Hróður Hafnarfjarðarleikhússins hefur farið víða enda er það í framvarðarsveit íslenskra leikhúsa. Fornri menningu landnámsmanna og víkinga má kynnast í víkingaveislum Fjörukrárinnar og á víkingahátíðum. Þá er lista- og menningarhátíðin Bjartir dagar haldin ár hvert í júnímánuði og á aðventunni heimsækja allir Jólaþorpið. Ekki má heldur gleyma alþjóðlega Höggmyndagarðinum á Víðistaðatúni.
Tónlistarlíf er í miklum blóma en í Hafnarfirði starfa um 15 kórar fyrir utan skólakóra og í rokkinu er mikil gróska.
Íþróttabærinn
Hafnarfjörður er mikill íþróttabær. Oft er sagt að bærinn sé vagga handboltans á Íslandi. Íþróttanámskeið hófust á vegum Íþróttafélags Hafnarfjarðar 1927. Fyrsti opinberi handboltaleikurinn á Íslandi fór fram á Hvaleyrarholtsvellinum 1925. Þar kepptu stúlknalið. Á fyrstu árum handknattleiksins voru það þó einkum piltar úr Flensborgarskóla sem stunduðu íþróttina og kepptu reglulega við nemendur úr Menntaskólanum í Reykjavík. Veturinn 1994-1995 voru í fyrsta sinn þrjú hafnfirsk félagslið í fyrstu deild í handboltanum.
Hafnfirskir íþróttamenn standa einnig mjög framarlega í frjálsum íþróttum, fimleikum, sundi, knattspyrnu, körfuknattleik og golfi. Hestaíþróttin er einnig vinsæl. Þá er starfræktur öflugur siglingaklúbbur í Hafnarfirði.
Brandarabærinn
Í flestum löndum mun víst tíðkast að henda gaman að íbúum einstakra héraða og bæja sem þykja á einhvern hátt skera sig úr. Af þessu spretta skondnar sögur um fólk sem ekki þykir stíga í vitið eða er á einhvern hátt sérkennilegt. Nú er svo komið fyrir Hafnfirðingum að athafnir þeirra og tilsvör virðast ætla að verða óþrjótandi nægtabrunnur gárunga og spéfugla um land allt. En auðvitað taka Hafnfirðingar þessu létt og hafa bara gaman af. Margir kunna reiðinnar ósköp af Hafnarfjarðarbröndurum og ekki er verra að hafa þá á takteinum þegar Vinir Hafnarfjarðar og aðrir góðir landsmenn hefja skothríðina! Hér koma tvö dæmi:
Hvers vegna setja Hafnfirðingar alla stóla út á svalir þegar degi tekur að halla ? Svar: Auðvitað til þess að sólin geti sest ! Hvers vegna er flóð og fjara í Hafnarfirði ? Svar: Þegar Hafnfirðingar komu niður að sjónum í fyrsta sinn þá brá sjónum svo mikið að hann hörfaði hið snarasta. Núna kemur hann tvisvar á sólarhring til að athuga hvort þeir séu þarna ennþá ! Við hvetjum alla sem koma til bæjarins að læra nokkra Hafnarfjarðarbrandara svo þeir eigi auðveldara með að aðlagast okkar litríka samfélagi.
Álfabærinn
Að margra dómi leynist ýmislegt í Hafnarfjarðarhrauni sem ekki er þó öllum gefið að sjá. Alla tíð hafa menn trúað því að huldufólk og dvergar ættu sér bólstaði í klettum og skútum. Þessar huliðsvættir hafa löngum lifað í sátt og samlyndi við mennska íbúa staðarins. Margir hafa talið sig verða vara við hvítklæddu konuna með silfurbeltið sem sögð er búa í Hamrinum, höll álfanna.
Eftirfarandi frásögn er byggð á reynslu konu sem bjó lengi í grennd við Hamarinn. Hana dreymdi að henni væri boðið að koma inn í Hamarinn. Leiddi hvítklædd kona hana um glæsileg híbýli hallarinnar. Þegar þær gengu um salarkynnin sá konan margt skringilega klætt fólk. Það var allt í marglitum klæðum og hneigði sig þegar það sá álfkonuna. Þessi draumur rennir stoðum undir þá kenningu að í Hamrinum búi álfar af konungakyni. Mörg dæmi finnast um það á Íslandi að vegastæðum hafi verið breytt vegna óhappa sem rakin hafa verið til álfa eða huldufólks. Við Merkurgötu í Hafnarfirði þrengist akvegurinn t.d. mjög við álfaklett sem skagar út í götuna.
Til er huliðsheimakort þar sem byggðir huliðsvætta í Hafnarfirði hafa verið skráðar eftir leiðsögn Erlu Stefánsdóttur sjáanda. Þar segir: "Hafnarfjörður er bær manna og hulduvera. Um leið og hægt er að skynja álfaverur í hverjum húsagarði er hraunið sérlega lifandi, með dvergum, jarðdvergum og allskyns álfaverum". Fólk er hvatt til að verða sér úti um huliðsheimakortið sem fæst á Upplýsingamiðstöðvum ferðamanna í Reykjavík, Mál og menningu og Þjónustuveri Hafnarfjarðarbæjar.
Víkingabærinn
Í meira en áratug hafa Hafnfirðingar haldið árlega víkingahátíð í júní við Fjörukrána sem sótt er af víkingum víðsvegar úr heiminum. Á víkingahátíð leiða saman hesta sína bardagamenn og bogaskyttur, glímumenn, útskurðarmenn, steinhöggvarar, járnsmiðir, sögumenn, seiðkonur, tónlistarmenn og galdramenn. Það er óhætt að fullyrða að á hátíðinni ríki sannkölluð miðaldastemning, gleði og glaumur.
Vertu velkomin í heimsókn til Hafnarfjarðar - fáðu upplýsingar um afþreyingu hér eða í þjónustuverinu við Strandgötu.
